Сэтинньи ый 14-18 күннэригэр 2 №-дээх улахан бөлөххө «Байанай » нэдиэлэтэ буолан ааста. Иитээччилэр «Байанай» туһунан оҕолорго билиһиннэрдилэр. Элбэх кинигэни, видео устуулары көрдөрдүлэр. Нэдиэлэ устата оҕолор элбэҕи биллилэр. Кыргытар кыыллар тустарынан хоһооннору, уолаттар «Мунха » үнкүүүтүн  үөрэттилэр. Кыыллар суолларын билистилэр, булт тэриллэрин көрдүлэр. Күһүҥҥү муҥха туһунан видео киинэни көрүү тэрилиннэ. Оҕолор олус кэрэхсээн көрдүлэр, ким аҕата, эһэтэ муҥхаҕа сылдьыбытын  туһунан үөрэ-көтө кэпсээтилэр. «Мин аҕам, эһэм бултаабыт бултара» диэн стендэ оҥорон аҕалан киэн тутта кэпсээтилэр.Нэдиэлэ устата ыытыллыбыт тэрээһиннэртэн  төрөппүттэрбит туора турбатылар. Ол курдук, «Күөгүһүттэр» оонньууга уус аҕабыт Егоров П.И. фанераттан собо балыктары быһан аҕалбытын,  уруһуйдьут ийэбит Оконешникова Н.Н. выжиганиенан сиэтэн киэргэтэн биэрдэ. Ону сэргэ «Ааттаһарым Байанай, аһатарым-Аар тайҕам» дьиэ-кэргэнинэн  кэтэхтэн викторина буолла. Бу викторинаҕа ордук толору ис хоһоонноох эппиэти биэрэн Егоровтар дьиэ-кэргэн кыайыылаах үрдүк аатын ылла. Кинилэр грамотаны,  «Байанай» сурунаалы , бэлэх туттулар. Нэдиэлэ устата ыытыллыбыт үлэ түмүктүүр түһүмэҕэр аралдьыйыы буолла. Манна булчут эһээлэрбит кэлэн булт сиэрин-туомун кэпсээтилэр, хаартыска көрдөрдүлэр, бултаабыт бултарын, туттар тэриллэрин аҕалан  сиһилии кэпсээн оҕолор сэҥээриилэрин ыллылар.  Ону тэҥэ көрдөөх күрэх ыытылынна. Бу күрэхтэргэ оҕолор хайыһарынан сүүрдүлэр , сыал бырахтылар, атынан күрэхтэстилэр, кыыллар суолларын таайдылар. Аҕалар,эһээлэр эмиэ сыал бырахтылар, саха сирин көмүс хатырыктаах балыктарын таайдылар, булт сааларын ханна оҥоһуллубутун таайдылар. Бу курдук бэрт сэргэх тэрээһинтэн бары да астынан тарҕастыбыт